ხუთშაბათს, 29 მაისს, საგამოფენო ცენტრ „ექსპო ჯორჯიას“ მე-11 პავილიონში ოფიციალურად გაიხსნა თბილისის 27-ე საერთაშორისო წიგნის ფესტივალი. ღონისძიებას ესწრებოდნენ მეცნიერებისა და კულტურის სფეროს წარმომადგენლები.

ტრადიციულად, თბილისის წიგნის ფესტივალზე წარმოდგენილი იყო ირანის სტენდი, რომელიც ორგანიზებული იყო ირანის ისლამური რესპუბლიკის საელჩოს კულტურის განყოფილების მხარდაჭერით და ალ-ჰოდას საერთაშორისო ინსტიტუტის მონაწილეობით.

ირანის სტენდზე გამოიფინა 50-ზე მეტი დასახელების წიგნი ირანელი ავტორებისაგან, როგორც სპარსულ, ასევე ინგლისურ ენებზე. გარდა ამისა, წარმოდგენილი იყო ირანის საელჩოს კულტურის განყოფილების მხარდაჭერით გამოცემული 30-მდე დასახელების წიგნი — მათ შორის, კლასიკური და თანამედროვე ირანელი ავტორების ქართულ ენაზე ნათარგმნი ლიტერატურა.

წიგნებთან ერთად, ფესტივალზე გამოიფინა ორიგინალური ირანული ხელნაკეთობების კოლექციაც, რაც ვიზიტორებს შესაძლებლობას აძლევდა გაეცნოთ ირანის უნიკალური ტრადიციული ხელოვნება. ფესტივალის ფარგლებში გაიმართა შეხვედრები ქართველ წიგნის მოყვარულ აუდიტორიასთან. ფესტივალის პირველ საღამოს გამართული ღონისძიების ფარგლებში ქართველმა მთარგმნელებმა — თეა შურღაიამ და გიორგი ლობჟანიძემ — ისაუბრეს სპარსული ლიტერატურის ქართულ თარგმანებზე, თარგმნის პროცესში არსებული გამოწვევების, მათი გადაჭრის შესაძლო გზებისა და მხარდაჭერის მნიშვნელობის შესახებ.

საფესტივალო კვირეულის მეორე დღეს დამსწრე საზოგადოების წინაშე კვლავ წარსდგა მთარგმნელი და აღმოსავლეთმცოდნე გიორგი ლობჟანიძე. მან ისაუბრა თავის ვიზიტზე თეირანის საერთაშორისო წიგნის ბაზრობაზე, რომელიც გასულ წელს შედგა.

ფესტივალის დასკვნითი დღე, რომელიც დაემთხვა ბავშვთა დაცვის საერთაშორისო დღეს, სპეციალურად მიეძღვნა სპარსული საბავშვო ლიტერატურის ქართულ თარგმანებს. ღონისძიება ირანის საელჩოს კულტურის განყოფილების ორგანიზებით ჩატარდა. ღონისძიებაში მონაწილეობა მიიღეს თბილისის ოთხი საჯარო სკოლის სპარსული ენის შემსწავლელი წრის მოსწავლეებმა. მათ დამსწრე აუდიტორიას გაუზიარეს საკუთარი შთაბეჭდილებები სპარსული საბავშვო ლიტერატურის ნაწარმოებების წაკითხვის შემდეგ.