საადი შირაზელი - სიტყვის ჭეშმარიტი დიდოსტატი

აბუ მუჰამად მუსლიჰედინ იბნ აბდოლაჰ შირაზი, ცნობილი პოეტური ფსევდონიმით საადი, სპარსული ლიტერატურის კლასიკოსი, ცნობილია თავისი უკვდავი ნაწარმოებებით „ბუსთანი“ და „გოლესთანი“. საადი შირაზელის შემოქმედება სპარსული კლასიკური ლიტერატურის ერთ-ერთ მწვერვალად არის აღიარებული. საადიმ განვლო უაღრესად საინტერესო ცხოვრების გზა. იგი დაიბადა ფარსის პროვინციაში, ქალაქ შირაზში. განათლება მიიღო ბაღდადის ცნობილ უმაღლეს სასწავლებელში „ნიზამიეში“. იგი ჯერ კიდევ ახალგაზრდა გაემგზავრა წმინდა ადგილთა მოსანახულებლად. მან მოიარა მუსლიმანური აღმოსავლეთის ბევრი ქვეყანა, არაბული ქვეყნები, ჩრდილოეთ აფრიკა, მცირე აზია, სირია და ინდუსტანი. საადის ეს მოგზაურობა 25 წლამდე გაგრძელდა.  მისი მოგზაურობა ხშირად ფათერაკებითაც იყო აღსავსე. ქვეყანანანახი და დაბრძენებული პოეტი უბრუნდება თავის მშობლიურ მხარეს, შირაზს და წერს დიდაქტიკური ხასიათის ორ ნაწარმოებს: „ბუსთანს“ და „გოლესთანს“. მისი უნიკალურობა მდგომარეობს მისი ენის სიმსუბუქესა და სიმარტივეში. ამ ორმა თხზულებამ ავტორს უაღრესად დიდი სახელი მოუხვეჭა. გარდაიცვალა შირაზში 1292 წელს. დაკრძალულია იქვე.