ოთხშაბათს, 2022 წლის 23 თებერვალს, ირანის ისლამური რესპუბლიკის საელჩოს მოწვევით,  საელჩოს შენობაში გაიმართა შეხვედრა საქართველოს რელიგიის საკითხთა სახელმწიფო სააგენტოს თავმჯდომარესთან ზაზა ვაშაყმაძესთან და მის მოადგილეებთან. შეხვედრაზე ირანის საელჩოს დროებითმა რწმუნებულმა ბატონმა მოჰამად ყობადიმ სტუმრებს წარუდგინა საელჩოს კულტურის განყოფილების ხელმძღვანელი ბატონი აჰმადალი მეჰრი არდესთანი და აღნიშნა, რომ  ირანის ისლამური რესპუბლიკის ყველა კულტურული და რელიგიური  საქმიანობის დაგეგმვა და კოორდინაცია საქართველოში განხორციელდება საელჩოს კულტურის განყოფილების და მისი ხელმძღვანელის მიერ. თავის მხრივ ბატონმა მეჰრიმ მადლობა გადაუხადა სააგენტოს ხელმძღვანელს ორმხრივი თანამშრომლობისა და საქართველოში რელიგიების მშვიდობიანი თანაარსებობის საქმეში მათი დიდი წვლილისათვის. მან ასევე განაცხადა, რომ ირანის ისლამური რესპუბლიკა ყოველთვის მხარს უჭერს რელიგიათაშორის დიალოგს და თანამშრომლობს რელიგიურ ლიდერებთან რელიგიების დაახლოებისა და მსოფლიოში მშვიდობის დამყარების მიზნით.